Da·al salni bako West Garo Hills, Tura Matchakolgre L.P. School kal·chakram bakrao a·songni chang 79-gipa jakgitelani salko maniangaha. Ia chang maniaona Deputy Chief Minister Snaiwbhalang Dhar mongsonggipa ong·e sokbaaha jeon ua ge 25 march past contingent-rangni salamiko ra·chakangaha.
Jakgitel ong·ani salko maniengon Tura DEF, 2nd MLP Battalion, Goeragre aro 2nd MLP Battalion, Goeragre-ni Band Party na agreba adita dingtang dingtang skul aro college rang march past contingent ong·e bakko ra·angaha. Iamangara Tura Government College, Don Bosco College, Don Bosco Higher Secondary School, Pechon Memorial Higher Secondary School, St. Mary’s Higher Secondary School ni measa aro mechik NCC dolrang ong·a. Apsan dake Garo Union Higher Secondary School, Don Bosco Higher Secondary School, St. Xavier’s Higher Secondary School, St. Mary’s Higher Secondary School, Christian Girls’ Higher Secondary School, Government Girls’ Higher Secondary School, aro Garo Union Higher Secondary School ni Scout aro Guide dolrangba bakko ra·angaha.
Ia gamchatbegipa salko maniengon bang·a chrok mesaani, git ring·ani aro jakgitel ong·ani salo pangchake chadambe, pante, metrarang dakmesokangaha. Una agreba Tura, Dobasipara Unit BSF dolrang kamo aro operation rango jakalenggipa skia man·gipa achakrangni changa sapakoba mesokangaha.
Tom·bimongani bako mongsonggipa sokgipa Deputy Chief Minister Snaiwbhalang Dhar, MBOSE porikkao chua gadango chu·sokgiparangna certificate aro award ba boksisrangko on·angaha. Mande ra·ako man·gipa chatro chatrirangara Sherwood School, Tura ni Esther D. Shira, Don Bosco College Higher Secondary Section, Tura ni Samridhya Das aro Nev Sharma na boksis rangko on·angaha. Apsan dake ICSE aro CBSE ni topper Nokrek Heights Higher Secondary School, Turani Bakrime Rikande M. Sangma aro Tura Public School, Tura ni Jeremiah Chemikkim M. Sangma naba namgipa gadango chu·sokgipa ong·anina boksis rangko on·angaha.
Una agreba Flemington Nongrum-na uni Indian Army o bilsi 28 na dangdike kamko ka·anina aro Zila Sainik Welfare Office, West Garo Hills, Tura o uni bimchipe dangdike on·anina mande ra·enba boksisrangko pakwatangaha. Medical Record Officer Bensing Ch. Marak, Jehangir D. Shira, Grade IV, RCW Deboras R. Marak, LDA Amal Kr. Hajong, District Horticulture Office; Office of the Deputy Commissioner Supervisory Assistant, Establishment Branch-ni Balwan R. Marak aro District School Education Officer, West Garo Hills ni ning·o donggipa Government Boys Higher Secondary School, Turani Assistant Teacher Anne Tensie K. Marak-naba mande ra·bee boksisrangko sualangaha.
Garo Hills-o Music Recording aro Production-ko ka·dilchenggipa Linthon M. Momin-naba mande ra·ani chingita memento and certificate-ko on·angaha. Motorsports susagrikani a·bao Garo Hills aro Meghalaya-na rasong aro namgipa bimingko ra·bagipa Gautam Barman aro Assunta M. Sangma-ni depante Aneesh M. Sangma-naba apsan daken memento/boksis aro certificate-ko on·angaha.
Da·al salni march past ka·anio nambate dakmesokgipa skul aro college-ni Scouts & Guide dol aro NCC dolrangnaba boksis rangko on·angaha. NCC contingent rangni gisepo Tura Government College NCC me·asarang aro Don Bosco College NCC me·chikrang chegipa ongangaha. Don Bosco College NCC measarang aro Pechon Memorial Higher Secondary School, Tura me·chikrang gnigipa biapko man·angskaha. Scouts and Guides rangni gisepo Don Bosco Higher Secondary School Scout Troop aro St. Mary’s Higher Secondary School Guide Company chegipa ong·angaha. Apsan dake Mary’s Higher Secondary School Scout Troop and Christian Girls’ Higher Secondary School Guide Company gnigipa biapko man·angskaha.
Jakgitel ong·ani salko maniengon da·al salo dingtang mancha Tura, DC Park o salsana Mini Bazaar-ko ong·atenga jeon ge 20 na bate stall rango banga entrepreneur rang antangtangni tarigimin bosturangko mesokan baksana palanikoba dakangen. Una agreba da·al o Nokpante Productions, MGMP ni gita adita doka damanio changgipa sapgiparang git ring·mesoke ansaodilanirangkoba dakangen.
