Garo Hills Autonomous District Council (GHADC) -o kam ka·enggiparangni ja 43-ni man·a nangenggipa dormaharangko sorkari ta·raken watatgnok aro iani ja·mano council-o kam ka·enggiparangni dormaharangko matchote on·angna man·gnok ine District Council Affairs (DCA)-ni Incharge, Deputy Chief Minister Prestone Tynsong Budbar salo kobor ra·timgiparangna parakataha.
Council-ko sorkariosan dandanna nangaigija dingtang dingtang cholrangchi tangka paisa man·anirangko an·tangtangon pangchakna nanganiko GHADC-o kam ka·enggiparangna u·iate on·aniko dakchina Chief Executive Member (CEM) aro Executive Council (EC)-ko mol·molataha ine Deputy Chief Minister aganangaha.
ADC-rang an·tangtangni bil aro daito donganiko ma·sina nanga aro sixth schedule-ni ning·o tangka paisarangko nakatatani cholrang donga ine Prestone Tynsong aganangaha.
