Assam a·doko niamgri songdong a·chagiparangko a·rikgalaniko dakanichi North Garo Hills a·jani ning·o donggipa songrangona napsrukbaaniko champengsona Budbar salo Bajengdoba Multi Facility Centre-o North Garo Hills-ni Deputy Commissioner Abhishek Saini, Superintendent of Police Swapnil Pawar Vasantrao aro songni sordar-rang baksa tom·e chanchirimangaha.
Ia tom·anio Bajengdoba Block-ni ning·o donggipa songrangni sordar-rangko simsake dongchina mikrakataniko on·angaha. Unbaksana songni manderangko on·gimin niam aro ge·etaniko an·tang jako ra·e kamko ka·jachina aro kakket ong·gijagipa kobor-rangko skatang gipatjachinaba Deputy Commissioner aganangaha.
Indake ku·cholsan nangrime kamrangko ka·anichi North Garo Hills a·ja-ona niamgri napsrukbaaniko champengsona dakchakani ong·gen ineba DC agandapangaha. Ia tom·anio Bajengdoba C&RD Block-ni Block Development Officer Julius R Marak-ba dongpae bakko ra·angaha.