Garo Hills Autonomous District Council (GHADC)-o kam ka·enggiparangni ja 42 mangna dormaharangko man·janina Garo Hills jolni United Democratic Party (UDP) ni Youth General Secretary Arman G Marak uni suk ong·gijaniko parakataha.
Indake uamangni neng·nikarangko niaton namen dukni ong·a maina council o kam ka·enggipa bang·bataan sanna banna tangka paisa, bi·sarangna skul fee aro salantini nokna koros ka·na nanganirango sinjetaniko man·enga. Indakgipa obostao indita ru·uta somoirangna darang nokdangni janggi tanganiko nikon aiao inmanpilani ong·a ine Marak janapangaha.
Council-o kam ka·giparang uamangni tangkarangko man·a nangchongmota aro indake ru·uta bilsirangna dormaharangko on·a man·gijaniko a·dok sorkariko aro GHADC ni Executive Committee rangko kakket ong·e ja·ku de·angchina Garo Hills jolni UDP dolrang mol·molangaha.
