A·chik Christian Musician Society Tura, District Social Welfare Officer aro District HUB for Empowerment of Women nangrime Nasha Mukt Bharat Abhiyaan aro an·tangtangko so·ote sigiparangko champengsonagita mikrakatani program-ko Tura District Auditorium-o mijal salo ong·atangaha.
Da·ororo chadamberangni gisepo pekgipa bosturangko jakkalanichi nosto ong·atako man·enga aro bang·aan gisiknigita chanchisokjae an·tangtangko so·ote siaona sokenga. Ia program-ko pekgipa bosturangoni chel·e dongna dakchakna aro an·tangko so·ote siaoniko champengsona man·agita mongsongbate dal·drobaenggipa bi·sarangna ong·ataha.
Program-o Tura songjinmani adita school-rangni chatro chatrirang okamatako man·e bakko ra·angtokaha aro mitamrang selection porikkarang dongani a·selo sokbatokna man·jaha. Bakko ra·anggipa school-rangara Wadanang School, Little Flower Higher Secondary, Rootland, Mason Phillips Academy, Redemption Academy aro Government Girls’ Higher Secondary School ong·a.
Ia program-ona resource person ong·e agan talataniko ba skie on·agita MBOSE-ni Deputy Controller of Examination Balmuri Marak, ABDK Youth Director Durasal R. Marak aro WGH District Social Welfare Officer Madona Onasis T. Sangma sokbaaha. Uamang bi·sarangna bang·a cholrangni gimin agantalate on·angaha aro maikai gisiknigita bilake pekgipa bosturangoni chel·e dongna man·gen, unbaksana an·tangtangko so·ote siaoni naljoke dongna aro janggi tangani gimin u·i ra·china bang·a ku·pattianirangko talate on·angaha.
Program-ni bakko chatri chatrirang adita ring·anirangchi, doka dam·anirangchi aro drama-rangko dakmesokanirangkoba dakangaha jerangan skidapani aro ui masiani gnanggiparang onga.
