South West Garo Hills, Ampati-ni Multi Facility Centre (BADO)-o Mongolbar sal July 29 tariko Medical Assessment Camp-ko salsana ong·ate Disability Certificate-rangko gital daktaie on·angaha.
Ia Assessment Camp-ko District School Education Officer, District Mission Coordinator, District Project Officer aro District Social Welfare Officer baksa nangrime ong·atangaha.
Ia camp-ko chu·sokatna dakchakgipa Tura Civil hospital, official-rang aro bak ong·pagipa sakantikon ia camp-ko ong·atna dakchakanina DSEO Emphul Ch Marak mittelpilskaaniko dakangaha.
Ia Assessment Camp-ko ong·ataniona Tura Civil Hospital-ni Medical Superintendent-ni gita watata man·giparang sak bri specialist Doctor-rang jean Dr. Subir Hussain Junior Specialist ENT, Dr. Elivia N Sangma MD Opthamologist, Dr. Steve Cherak R Marak Psychiatrist aro Dr. Sunny M Sangma Junior Specialist Orthopaedic ong·a. Ia camp-o Saka Moikinshang Audiologist aro Sujata Das Physiotherapist ba dakchake on·aniko dakangaha.
Ia Assessment Camp-o sak 293 PWD rangni biming-rangko segataniko dakangaha. Ianoni sak 74 Locomotor ong·e neng·nikaniko man·giparang, sak 29 mikron nikanio bilgrigiparang, sak 50 ENT aro sak 60 gisikni gita bilgrianiko man·giparang ong·a. Saa dinganiko porikka ra·e niani ja·mano Tura Civil Hospital-ni District Resource Centre on Disability Affairs (DRCDA) ona ra·ange Unique Disability Identity (UDID) na biming segate certificate-rangko aro card-rangko PWD ong·giparangna Community-based Rehabilitation Workers (CBRWs) aro Multipurpose Rehabilitation Workers (MRWs) nigita on·angskagen ine aganangaha.
