West Garo Hills a·jani Te·teng A·jao donggipa Tura Government College-ni kal·chakramo Garo Hills-o skanggipa Skate Park-ko tarinagita Chief Minister Conrad Sangma pangchakani ro·ongko songe on·angaha.
Ia tom·bimonganiona Chief Minister Conrad Sangma mongsonggipa sokbaaha. West Garo Hills-ni Deputy Commissioner Vibhor Aggarwal, Superintendent of Police Abraham T Sangma , Traffic-ni SP Feroz Rehman, Government College-ni skigiparang, chatro chatrirang, Te·teng A·jani dilgiparang aro chadamberangba dongpae bakko ra·angtokaha.
Ia Skate Park-ko bang·a chadamberangna janggi tangani cholrangko namdapate on·a aro kal·susaanirango bakrimna gisiko nangatna miksonge tarienga ine Chief Minister aganangaha.
Una agreba a·dok sorkari skateboarding aro BMX-na State Championship-ko ia bilsini November ba December jao ong·atna miksonganiko Conrad Sangma aganangaha. Meghalaya a·doko 70% nigita sport-rangna rika cho·ani kamrangko batanggimin bilsi 7-ni gisepo tangka gong 2000 crore-nigita jakkal man·aha. Ia project-rangko chu·sokatanichi chadamberangko dilsretanirangko chel·e rakkina man·an baksana kal·susaanio gisiko nanggipa chadamberangna namgipa cholrangko on·aniba ong·enga ine Conrad Sangma aganangaha.
2027 bilsio ong·nasienggipa National Games-na Garo Hills-ni kal·susaanio gisiko nanggipa chadamberangko National Games-na bimchipe tarisamsoanirangko dakchina aro man·a dipet a·doktangna bang·a medal-rangko chebanagitaba didiangaha. National Games -ni closing ceremony ba bon·kamgipa salko manianiko Tura-o ong·atna sikaniko parakange bang·a neng·nikanirang donggenchimoba chu·sokatna jotton ka·gen ine Chief Minister Conrad Sangma parakangaha.
