South West Garo Hills a·jani Takuranbari aro Ishakuri songo niam gri songdonggiparang batroroenganiko nirokatchina Ampati jolni A·chik Holistic Awakening Movement (AHAM) dol Deputy Commissioner aro Superintendent of Police-na chittiko on·angaha.
Ia jolrango Muslim nokdangrang niam gri songdonggiparang ta·rakbee batroroenga jekon songtangoni manderangan dakchakenga ine AHAM aganangaha. AHAM-ni parakatanigitade ia nokdangrang ia jolni a·arangko kakketgijagipa lekka pancharangko ra·bite dongenga. Voter ID rangko man·agita tol·e tarigipa BPL card rangko jakkalenga jeni a·selo a·paloni re·bae niam gri donggiparang bilsi 5 prako batroroenga ine uamang parakataha.
Iani bidingo re·anggipa 2023 bilsini February 21 tariko apsan nirokaniko dakani ja·manoba maming ja·kuko de·jaha ine AHAM dol parakataha. Iasan ong·aigija ia jolrang Meghalaya-ni ning·o ga·akoba Assam a·dokni JJM aro PMAY scheme-ni kamrangko ka·anikoba janapmanaha ine uamang aganangkuaha. Ia manderangoniko name dake nokprakona re·ange voter ID rangko niroktaichina aro bilsi 10 batao on·gipa lekka pancharangkoba che·eme am·sanditaichina AHAM dabiangaha.
Assam-Meghalaya sima ari jolni Mirjumala songo namgijagipa kamrang jekai pekatgipa bosturangko badingna, ra·sruke katgiparang aro niam gri napsrukanirangna kol ong·ani giminba AHAM dol nirokatchi janapatjolaha. Unikoa, Assam a·dokni a·rikgalata man·gipa manderang Ishakuri aro Takuranbari songrangona napana jotton ka·manenggenok ine aganangaha. Iarangni a·selo jolni songdongkamgipa jatrangna maming neng·nikaniko ra·bajachina, a·dok chigani tom·tomanina aro jatko champengsonagita ia niam gri songdonggiparangni bidingo nama ja·kuko ga·e nirok simsakchina AHAM dol didiangaha.
