Da·al salni bako West Garo Hills a·jani Pedaldoba jolo Garo Hills Autonomous District Council (GHADC) ni ning·o man·gipa songrango niam gri napsruke songdongenggipa manderangko dingtang dingtang NGO dolrang baksa bakrime a·rikagalaniko dakangaha.
B-Mahal jean West Garo Hills a·jani Pedaldoba jolo GHADC ni ning·o donggipa ong·achim jeon niam gri nok jamrangko rike songdongenggipa manderangko a·rikgalangaha. GHADC ni dilgiparang chong·motan CEM Albiniush R Marak aro Deputy CEM Nikman Ch Marak ni re·dilanio MDC rang aro adita pressure group rangba apsan bakrime niamni a·palo songdongenggipa manderangni nokrangko pe·angaha.
Ia somoio niamgri ba niamko tale u·igijagiparangna talate on·atchina dilgiparangko adita sing·anirangko dakangon uamangni nangchongmotgipa lekka pancharang jekai ID card, Trading License, NOC aro a·a patta rangko am·sandiangaha ine talatangaha. Unbaksana manderangni maidakgipa kam ka·na nanggnigiparangko dakna nangani bidingoba tale on·angaha aro je nokdangrang niamni a·palo songdonggiparangni kosako mikkangchi Council ni dilgiparang rakgipa ja·kuko de·anggen ine raken ka·mikkenatangaha.
