Agia-Medhipara-Phulbari-Tura (AMPT) ramani nosto ong∙anina NGO dolrang PIL on∙anggipani bidingo Meghalaya High Court ia gamchatbegipa ramako name tarie on∙china ge∙etangaha. PIL on∙angani gitade ia ramarangko adita taritaianirang dongoba name baikamna gita tarijaenga ine janapangahachim. Ia soroko ru∙utgijaan a∙kilokrang aro chi skonge donganichi sorokni a∙parang nosto ong∙e re∙ruraenggipa garirangna neng∙nikani ong∙enga ine parakangaha. A∙dokni PWD department ia ramarangko taritaitaina nangjanagita changsano name tarie on∙a nanga ine Court aganangaha.
Dhubri-oni Phulbari-ona dolong taribaenggipa matchotjokode, Phulbari damsa gamchatbegipa biap ong∙e sorokko jakkalgipa aro gari gorarangni re∙ruraanirangba batrikrikgenok ine Court janapangaha. Court iarang pilakko niksoe PWD department-ko NHAI baksa golporime AMPT ramako dal∙dapatna aro namdape tarina, North Eastern Council-oniko tangka paisarangni dakchakaniko am∙na nanga ine Court janapangaha. AMPT gamchatbegipa rama dilsa ong∙anina court a∙dokni PWD department ko kakket ong∙e aro jakmine ia ramako tarie on∙china ge∙etangaha. Mikka wasimsimani a∙selo ua rama baijaenga ine pa∙sikanikoba ra∙chakna man∙ja maina a∙doko mikka wasimsimgipa biaprangni ramarang ru∙uta somoina baikame dongenga ineba Court agandapangaha.
