Education Minister Rakkam Sangma, rel gari ramarangko Baghmara-ona ra·angna Chief Minister-na memorandum on·gipani bidingo ma·mong baksa golporimanio ka·dongsona man·aniko mijal salo parakangaha. Battanggimin salrango ua Conrad Sangma-ko rel gari ramarangko Chokpot-gita ba Tura, Tikrikilla ba Dalu-gita Mendipathar-oni Baghmara-ona ra·angskana mol·molangaha.
Jakgitel ong·na skang Bangladesh a·song East Pakistan ong·engmitingon ia jolo bading chiwalani donganikoba Sangma janapaha jean bak dakata ja·man champenganiko man·aha ineba ua aganaha. Bhagmara-ona rel gariko ra·angenchimode Bangladesh a·songona aro gipinrangona bajar antirangona sokangna man·gen. Iasan ong·aigija a·doko man·gipa gamjinrang aro jatni bosturangkoba name chalaina man·gen ine Sangma aganangkuaha.
Una agreba kamrangko bikotani aro janggi tangani cholrangko tang·doatna dakchakgen ine Sangma parakangaha. Rel garirang dongode bang·a gamchatgipa a·barango jekai tourism, ge·e game cha·ani, re·a doani, bading chiwalani aro gipinrango dal·rorona man·gen. Indake dakengon Meghalaya a·dok sorkari kamrangnasan pangchakna nangaigija an·tang biltango chadengna man·gipa ong·gen ine Sangma agandapangaha.
Iani bidingo Chief Minister a·doko janggi tangani cholrangko tang·doatna nanganiko ma·sigipa ong·e ma·mong baksa golporimna ka·dongsoaniko Rakkam Sangma parakangaha.
