Prime Minister Narendra Modi, Meghalaya a∙doko dingtanganiko nike an∙tangni bilo pangchakna man∙gipa aro neng∙nikanioni chakchike tang∙dona man∙gipa ine ra∙song chae aganangaha. Ia kattarangko ua Finance Minister Nirmala Sitharaman-ni a∙dokona re∙bae parakatani ja∙mano social media X o aganangskaaha.
X o see u∙iatanio ua Finance Minister-ko minge Meghalaya-ni dingtang dingtang a∙bao jekai tourism, chadamberangna bilko ba cholrangko on∙ani, me∙chikrangni dilenggipa SHG rang, PM Suryaghar Muft Bijli Yojana, songo noko program-rangko dakdilani aro gipinrango tang∙doaniko janapangaha. Sorkarini dakchakanichi aro songsalni bakrimanichi unabaksana tikelanichi Meghalaya a∙dok chakchike dal∙na man∙gipa aro pangchakna nanggijagipa ine India a∙songna dakmesokani ong∙aniko Modi parakangaha.
Ma∙mong sorkarini Minister Nirmala Sitharaman, re∙anggipa July 10-13 tariko salbrina Meghalaya-ona re∙baaha. Uni dongangani somoio ua a∙dokni bim∙chipaniko, ka∙donganiko aro bola wa∙a chiring chibisik baksa tom∙tome donganiko nike namnikmanchae aganaha. India a∙songni saksa niksenggipa dilgipaoni rasong chae agangipa kattarangara a∙dokna didianiko on∙a. Unbaksana mikkangchina nisengsoe tarisamsona namgipa skiani aro miksongani gnang re∙mikkangna cholko on∙aniba ong∙a.
