North Garo Hills, Lower Bolmedang , Wakau Gittim-o songdongenggipa manderangko ‘SONGSAREK’ ong·anina songoniko a·pal galani bidingo FIR ka·giminko mamingba am·sandiarangko dakjani gimin Kharkutta Police Station-ni SI Officer in-charge-ni kosako NGH-ni Superintendent of Police-na badi ka·doangaha.
Lower Bolmedang, Wakau Gittim-o songdongenggipa Enos Sangma aro Willnever Arengh-ko re·anggipa January 14 tarik 2025-o songni dilgiparang nok jamrangko nosto ka·e songoniko a·pal galangaha. Songsal baksa pilak nanganirango, gila kem·anirango bakko ra·pagenchimoba songoniko galgrimani ja·mano songni forest reserve-oniko am·bolrangko chimongnagita on·jaha, NREGA, sorkarini on·gimin scheme-rangni man·gnirangko on·jaha aro bi·sarangko songni kal·chakramo ropana ba kal·pana nokchakjaha ine badi ka·anio janapangaha. Uamangko rikgalani ian skanggipa chang ong·ja jeon battanggimin somoio apsan daken rikgalaha aro badi ka·ani court o jachange dongengkua ine parakataha.
July 7 tarik 2025-o songoniko a·pal gale namgija dake jakkalanina songni dilgiparang jerangan Greaterson Marak, Jitalson Sangma, Kington Momin, Plindro Momin, Golbeng Momin, Banseng Sangma, Lipston Marak, Dalsing Sangma, Gilbirth Arengh, Dronath Sangma aro Chaila Sangma-ni kosako Kharkutta thanao Officer in-charge o badi ka·aniko dakahaoba mamingba am·sandianirangko dakjaha.
June 10 tariko Officer I/c batesa badi ka·dogipa nokona re·ange chu·gimik nok 76 oni 16 galgrima man·giparangko jinma baksa dakgrikna man·chakjawa ine agane bamgope on·china aro jinmani aganagita ra·chake badi ka·aniko bon·atchina didiangaha. Unikoa June 14 tariko re·angtaie uamangni kosako thanao bang·a badi ka·anirang gnang ine police station-ona somoigita sokchina u·iataha.
July 16 tarik 2025-o Police station-ona re·angtaion Kharkutta Women Police Station-ni Officer In-charge Pinky Momin uamangko namgrikchina agantaiaha aro maming kattako sea grigipa lekkako on·e soi ka·china draataha. Indioba uamang soi ka·na jechakaha aro namgrikaniko dakna ra·chakjaha. Uni ja·mano Momin namgrikna man·jawa ine uamangoni saksa ma·gipako changgitam dake aganatenba drae video record ka·enba NGH SP-na watatna aganaha. Unikoa badi ka·anikoba da·alan bon·aha aro matnanga man·gipa mandeni kosako maming sinjetanirang dongjawaha ine aganangaha.
A·rikgalgipa manderangni kosako antisana kingking badi ka·aniko maming dakgija galchipani ja·mano galgrima man·giparangni kosako pangpil badi ka·gipakosa Officer I/c niatchengenba uamangko thanaona salgni gisepo re·angna agantaiaha. Ia Officer-ni kamrangan unbaksa aro matnanga man·gipa gipin manderang baksa meligrikaniko mesoka. Ian Officer-ni daitotangko ka·gija dolsana chakaniba ong·a aro police thanao kakket bichalko am·ani bilko champengani ong·a ine galgrima man·gipa manderang parakataha.
Uni gimin ia pilakon nirokate neng·nikanirangko man·enggipa nokdangrangna kakket bichalko ta·raken on·china aro Officer I/c ni kosako raka ja·kuko de·china Superintendent of Police-o mol·molangaha.
