A·doko ge·e game man·gimin bosturangko gipin a·songrangona watate bading chiwalaniko tang·doatna miksonge Lulu Group International-ni sak 8 watatako man·giparang Global Operations-ni Director Salim M.A ni dilanichi re·bae gronganiko dakangaha. Uamangni a·dokona re·baaniara batanggimin 2023 bilsini November-o Lulu Group International aro Meghalaya State Agricultural Marketing Board (MSAMB) dolgnini gisepo World Food India, New Delhi-o Memorandum of Understanding (MoU) ko soi ka·grikanggipani bak ong·a.
Battanggimin bilsignirangonin MSAMB altuen GI-tagged man·gimin Khasi Mandarin, anaros, e·chingrangko sildorenggita aro jahas-ranggita gipin biaprangchina bosturangko watataniko dakenga. Meghalaya a·dok 13 metric ton-ni GI-tagged Khasi Mandarin aro 10 metric ton-ni anaros-rangko Middle East-rangona watataha. Re·anggipa March 2025-o 15 metric ton-ni bisi grigipa e·ching-rangko MSAMB, Eastern Ri-Bhoi Organic Farmer Producer Company baksa nangrime Dubai ona watatgipa chu·sokgipa ong·angaha.
Ia chu·sokaniko bil·akdapatna re·anggipa bilsio Department of Agriculture and Farmers’ Welfare ni official-rang aro sakchet mang a·dokni dingtang dingtang bakrangoni ge·e game chagiparang Dubai ona re·angaha. Uamangni re·angani miksonganiara a·song gipinoni ra·bagipa bosturangko badinganio mikrontangchi nike ma·sie ra·na, damrangko tik ka·na aro bregiparangna nangnikagita nambatgipa biterangko on·a u·i ra·na ong·a. Ia somoio uamang wholesale ra·gipa Aweer market baksaba agan golpogrikaha, Our Wellness Village Cafe Sharjah o biterangko mesokanioba bakko ra·aha aro Lulu Hypermarket, Silicon Oasis o an·tangtangni bosturangko mesoke donakoba nikangaha.
Ian a·dok sorkarini ge·e game chagiparangna niksamsoe kam ka·anisan ong·jaenga indiba bading chiwalani ja·pangko Lulu Group-rang baksa apsan kamrangko ka·aniko baikamatna miksonganiba ong·enga. Sorkari ong·e uamang baksa bakrimanio bimchipe aro on·kangen dakgen ine Chief Minister Conrad Sangma parakaha. Tangkarangko jakkalagitaan kamrangko chu·soke ka·anian sorkarini miksongani ong·a jedakode a·dokni bosturangko international market-ona watatani tang·dororona man·gen ine Sangma aganangaha.
