Winter capital-ni bidingo chanchirimnagita NGH Karkhutta o NGO dolrang baksa bang·a songrangni Nokmarang, Lasker rang aro songdonggipa manderang tom·aniko mijal salo ong·ataha.
Ia tom·aniona A·chik State Peoples Front (ASPF) dolni General Secretary Bernita Marak sokbae winter capital-na ku·cholsan ong·e dakgrikna aganangaha. Skang chengoni Assam-oni Meghalaya dingtang ma·ekaoni aro Tura-ko winter capital dakna miksonganiko Khasi rang ra·chakmanahaoba da·ona kingkingba chu·sokatna man·kujaenga ine Marak aganaha. Ku·cholsan ong·jaode, bakrimjaode aro apsan ku·rang on·jaode A·chikrangni dabianiko knajawa ine Marak manderangko winter capital-ko chu·sokatna bil·ake kam ka·china aganangaha.
GSMC dolni Acting Chairman, Balkarin Marak, tom·anio aganengon Garo Hills-o bang·a neng·nikanirang donganiko janape ia chu·onggipaniko kolgapatna winter capital mingsa ongpaa ine parakangaha. Ia chasongon dabianiko chu·sokatode mikkangchi dedrang su·drangrangna nambegipa ong·gen ine ua sakantiko jak on·pae ku·mongrimna aganangaha. Ia tom·anio bang·a gipin dilgiparangba aganangtokaha aro apsandaken darangni agananion winter capital-ko nang·nike ka·oksianiko knana man·aha.