Adita salrangna skang Winger gariko salenggipa driver rangko Tura Winger Association ni dilgiparang uamangko champenge songregipa manderangna bang∙a neng∙nikanirangko on∙angaha. Uamangni dake dakanichi apsan daken Dalu-oba Baghmara ona regipa Winger gariko champengatskaaha.
Ia ong∙enggipa obostarangni bidingo West Garo Hills-ni District Transport Office (DTO) ni am∙sandianiko dakon, Chasingre jolo Meghalaya a∙palni garirang jean Assam-o register ka∙gipa garirang chu∙gimik nanggipa lekka pancharang donganiko ma∙sina man∙aha ine parakataha. District Transport Officer SD Shira ni agananigitade lekka pancha chu∙onggipa garirangko darangba champengna bil dongja maina interstate agreement ni ning∙o pangchake garirang Assam, Meghalaya, Mizoram aro Arunachal Pradesh a∙dokrangona manderangko salrurana bil donga ine aganangaha.
Indake niam-ni kosako gari salgiparangko manderang ba je dolrang champenggenchimode uamangni kosako kragipa sastiko on∙a man∙aniko janapangaha. Iako aganengon, Transport department ni niam-ko pe∙e lekka pancharang chu∙onggijagipa garirangko chagrongenchimode uamangni kosakoba ja∙kurangko de∙anggen ine Tura songjinmani drivers’ association na ka∙donganiko on∙angaha.
