Meghalaya a·doko bijoli sokataniko bariatnagita a·dok sorkari, Union Ministry of Power-oniko gong 2,270 crore tangkarangko dakchakatchina mol·molataha ine mijal salo a·dokni Power Minister AT Mondal koborna parakataha. Ia mol·molaniko chang 16 gipa National Power Committee (NPC) jekon NERPC-nigita tom·aniko ong·atanio janapangaha jeon Central Electricity Authority (CEA) aro NPC-ni chairperson Ghanshyam Prasad-ba dongpae bakko ra·angaha.
Ia gong 2,270 crore-ni projectrangko CEA ra·chakaha, jean 760 MVA aro transmission line-rangko 190 Circuit kilometres (Ckt km) mangona bariatna mangen ine Mondal aganaha. Bijoliko sokatna miksonganiko a·dok sorkari tarimanaha jekon CEA ra·chakaha. Unbaksana ia kamko chu·sokatna tangka paisanigita namen neng·nikanirangko man·anina a·dok sorkari aro Ministry of DoNER-nigita adita dakchakanirangkoba man·aha ineba Mondal aganangaha.
Indake tangka paisanigita neng·nikanirangko man·enganina, ia neng·nikanirangko komiatna iani bidingo name nirokatchina Ministry of Power-ko didiataha ine Mondal parakataha. Unbaksana 132 KV transmission line-ko Baghmara aro Bangladesh sima ari sepangjolgita donggipa songjinmarangona ta·rake sokatna nanganikoba janapataha maina da·o dipet ua biaprangona bijoli silitingrangko Forest Reserve aro Mongma batsotram ranggita ra·anigimin nirok simsakna neng·nikaniko man·enga ineba Mondal aganaha.
Una agreba 132 KV ko South Garo Hills, West Garo Hills aro South West Khasi Hills a·jarangona sokatna nanganiko janapan baksana 132 KV substation ko name watna Nongpoh-niko a·a ra·ani bidingoba janapangaha jean Ri-Bhoi a·jana bijoli watanio namen dakchakani ong·gen ine Mondal aganaha.
