North Garo Hills, Resubelpara-o Garo Hills Autonomous District Council (GHADC) ni Department-ni branch rangko songe on·china Rongrong Constituency-ni MDC Rinaldo K Sangma, GHADC-ni CEM Albinush R Marak na chittiko on·e mol·molangaha.
Resubelpara-ko 2012 bilsion District songe on·genchimoba GHADC-ni office dongjani a·selo North Garo Hills-o songdongenggipa manderang pilak nanga kamrangna jekai tax na kajina gamna, a·a patta tarina, bading chiwalna licence-rangko man·a aro court-ni nanggipa kamrangna Tura-ona re·angna nange tangka paisani gita koros-rangna aro somoi rangni gitaba bang·a nengnikanirangko man·a nangenga ine MDC Rinaldo K Sangma janapangaha.
Ia pilak neng·nikanirangko nirokate Resubelpara-o GHADC-ni department-ni branch rang jekai Land & Revenue Department, Taxation Department, Forest Department, Building Regulatory and Development Authority (BRDA) aro District Council Court Circuit Bench-ko donchina mol·molangaha. Iako ka·e on·anichi North Garo Hills-o songdongenggipa manderang Tura-ona re·angna nanggija a·jatangon pilak kamrangkon mikkangchi altuen kamrangko ka·na man·anggen ine Rongrong Constituency-ni MDC Rinaldo K Sangma aganangaha.
