Chibragreo donggipa 100 drums Wangalako manichakgipa a·damo mijal salo Wangala Committee, Social Forestry Tura Division aro A·chik A·song Environment Enthusiast Society (AAEES) bakrime bolrangko ge·angaha. Uamang iako bola wa·a chiring chibisikni gamchataniko ma·siatna aro manderangna mikrakaniko on·agita dakangaha. A·damni bang·a bakrango dingtang dingtang bolrangko pang 250 mangna baten ge·aha.
Social Forestry-ni Forest Ranger Martilina M. Sangma, ia re·mikkanganina namnikaniko parakange mikkangchiba department baksa bakrimgiparang donggenchimode apsan ku·monge kamko ka·na u·iatangaha. Ia a·damo biapko ka·sinatgipa bolrang jekai Pongamia Pinnata (bol ka·sin), bolsari, Delonix Regia (April) aro Ganol hydro power project sepang jol ong·ani gimin chiring chibisikko tangatgipa bol, unikoa nitoatgipa pul gnanggipa bolrangko ge·angaha ine ua aganangaha.
Batanggimin changrangoba ia a·damo bola wa·arangko ge·anirang dongaha. Indake ong·genchimoba jilla ka·anirang dongani a·sel nosto ong·ataha ine Wangala Committee-ni Chairman Rikman Sangma parakangaha. Da·o chang·satai ia biapko nitoatainagita bola wa·ani gamchataniko mikkango done bol ge·aniko daktaienga ine Sangma janapangaha. Garo Heritage Village-ni Secretary Rakkan Sangma bol ge·ani bidingo aganengon ge·e mangmang donaigija ja·mano nirok simsake tang·atchina ku·pattianiko on·angaha. Unikoa, gipinoniko ra·bae bolrangko ge·gija A·chik a·songo man·enggipa bolrangkon ge·china janapangaha.
AAEES-ni Chief Organising Secretary Henry Bryan Sangma-ba uamangni dolni miksonganirangko parakange chiring chibisik aro bola wa·arangko ripengna kangkare kae raken ja·ku ga·enga ine parakangaha.
