South Garo Hills a∙jani ning∙o donggipa Rongara-oni Taidang-ona tarigipa PMGSY ramako contractor-ni kam ka∙a namjani gimin Niksamso Garo Community Organisation (NGCO) Southern Zone dolrang suk ong∙gijaniko parakangaha.
Ua ramako re∙anggipa 2018 bilsioni tarina a∙bachengate 2020-o matchotatani ong∙achim. Somoiko dona gita da∙onaba matchotatkujaenga aro kam ka∙anirangba namja ine NGCO, Southern Zone-ni President Arjun S. Marak parakangaha. Ia ramako matchote kam ka∙e on∙pachina Rongara-ni Sub-Divisional Officer (SDO) aro Junior Engineer (JE) ko nirokatchinaba NGCO dolrang mol∙molangaha.
Garo Hills-ni namroro silroroanina ma∙mong sorkarini on∙atanirangko cha∙sote galna nangja aro je contractor jako ra∙e kamko ka∙engachim uni kosako rakgipa ja∙kurangko de∙aniko dakgen ineba NGCO mikrakataha.
