A·song ge·gnini gisepo so·sojengjeng ong·aniko nike, South West Garo Hills aro South Garo Hills-ni Indo-Bangla sima-ari jolo night curfew-ko ra·gatangaha. Ia niamko section 163 BNSS-ko jakkale a·jani Deputy Commissioner-rang ra·gatangaha. SWGH-o 8-oni pring 6 bajiona zero line-oni metre 200 aro SGH a·jao metre 500 mang chel·aona night curfew-ko ra·gatna tik ka·aha.
Ia somoiko chol ra·e ru·uta bilsirangna napchipenggipa bobil dolrangni napaaniko, badingsrukani, napsrukani aro a·song gipinoni manderangni so·sojengjeng ong·aniko ra·bana amgipa kamrangko champengsonagita curfew-ko ra·gatna nangaona ga·akaha. South Garo Hills aro SWGH a·jani jolrango napsrukgiparangna, a·songsa gipinna tom·tomaniko nosto ka·na aro bobil dolrangna namgija kamko jako ra·na nambegipa chol ong·gen ine parakataha.
Curfew-ni niam indake ong·gen chong·motan attam 8-oni pring 6 bajiona sima ari jolo re·ruraani mongsongbate batsotna man·jawa. Sak bonga aro una bate tom·dake silchidare unbaksana gipin bosturangko jekai rod, boltong aro ro·ongrangko ra·bitaniko champengani gnang. Sima ari jolo badingsrukani aro apsandakgipa niamni a·palo kamrangko donsogimin somoio ka·genchimode raka sastiko on·aba parakataha. Ia curfew da·aloni a·bachenge obostarang namkuja dipetona kingking ong·anggen.
