Pope Francis-ni siangani ja·mano Catholic ma·malo bebe ra·giparangna Cardinal Robert Prevost-ko gital Pope seokangaha. Ua mijal salo St. Peter’s Basilica-o manderangna skanggipa changna mikkangpaaha aro pangna dakrongbaengagita wal·ku gipokko Sistine Chapel-o ong·katataha jean Pope gitalko seokaha ine parakani ong·a.
Bilsi 69 ong·gipa Pope Robert Prevost-ko Leo XIV-ni bimingchi mingaha. Ua United States-ni skanggipa Pope ong·chenggipa ong·a aro da·o 267th gipa Pope ong·e 1.4 billion Catholic rangni gital dilgipa ong·aha.
St. Peter square-o ua manderangna mikkangpaani somoio Pope Francis-ko mande ra·angaha aro uni mingnamgipa kamrangko gisik ra·china didiangaha. Bang·a bebe ra·gipa hajalni hajal manderang gital Pope-ko nina sokbatokaha. Sak 133 cardinal-rangni gital Pope-ko seokaniko wal·ku gipokko ong·katate parakaton manderang kusi ong·e chrik a·bokaha. Leo XIV manderangna mikkangpaenba tom·tomani na·simang baksa ong·china ine agane pattianiko on·angaha.
