Tura songjinmani school-rangna ong·atgipa “Play On” Inter School Sports Meet kal·susaani mijal salo final susaanirangko ong·ate name matchotangaha. Ia “Play On” kal·susaaniko Artsourced, Directorate of Sports & Youth Affairs aro Tura Basketball Club apsan nangrime April jaani 4 tarikoni a·bachengataha.
Final ba bon·kamgipa salo Directorate of Sports & Youth Affairs, Director D D. Shira mongsonggipa ong·e sokbaaha. Unbaksana Sports & Youth Affairs-ni gitcham Deputy Director, Jasper P. Marak, Tura Public School-ni Principal Pranab Bhowmik aro Don Bosco Hr. Sec. School Tura-ni Principal Fr. Threnius N. Sangma-ba sokbaaha.
Closing ceremony-o basketball, football aro Esports rangni final-rangko susaataha. Basketball kal·susani skanggipa match-o Don Bosco Hr. Sec. School Tura-ni me·chik dolrang St. Mary’s Hr. Sec. School Aramile skul baksa susagrikangaha jeon Don Bosco School Tura 46-5 poinst-chi St. Mary’s Hr. Sec. School ko amchepataha. Apsan dake me·asa dolrangni susagrikanioba Don Bosco School Tura 51-21 points-chi Monfort Center For Education-ko amataha. Ian uamangni skulna salni gisepo me·a aro me·chik dol gninan winners trophy-ko cheani ong·aha.
Football-ni final-rangko kal·susaanio Don Bosco Hr. Sec. School Rongkhon baksa Tura Public School-ni chatrorang susaangaha. Kal·ani gisepo Don Bosco School Rongkhon somoi ru·utgijaan skanggipa goal-ko skanggipa half-o chipna man·aha. Gnigipa half-o Tura Public School free kick changgni aro penalty kick changsa cholko man·ahaoba score ka·na man·jaha. Ia susaanio Don Bosco School Rongkhon 3-0 chi final-ko chegipa ong·aha.
Play On-o bakko ra·gipa jillani gesku skulrangni dingtang dingtang kal·susanio chegipa chatro chatrirangna certificate, medal aro trophy-rangko on·angaha. Don Bosco School Tura aro Rongkhon, football aro Basketball-o skultangna mikkim rasongko ra·baaha. Tura Public School gipin adita banga kal·susaanio name bakko ra·e chegipa ong·enba Best School In Competition-ni Award-ko man·angskaaha.
Basketball kal·susaanio me·asarangoni Don Bosco Hr. Sec. School Tura-ni James Tirkey kal·a gimiko 61 points ko man·enba Top Scorer ong·aha aro me·chikrangoniba apsan skulnin Yatchi N. Sangma 19 points ko chipenba Top Scorer ni boksisko man·angaha.
Don Bosco Hr. Sec. School Rongkhon-ni football dolni Captain Tengsim K. Sangma Best Player aro Tura Public School ni Akangesa A. Sangma Overall Best Athlete ong·angskaaha.
