North Eastern Hill University (NEHU) Shillong campus-o Hindi Department-ni Assistant Professor Dr. Alok Singh-ko NEHUSU ni dilgiparang kragija dake doka sataniko janape ian chadamberangna kenchakani ong·naba donga aro uamang an·tangtangni gisepo meligrikgijanirangchi indakgipa a·selona sokataniara poraienggipa chatro chatrirangna man·dikataniko ra·baani ong·gen ine United A·chik Socio Economic Justice Forum (UASEJF) dol jegalanga.
NEHU-ni skigipa Dr. Alok Singh-ko NEHUSU ni manderangni ka·saninggija mande ra·gija doka sataniko ra·chakna man·gijaniko, skigipako dokaniko nie dongaigija kragipa aro kakket bichalko on·a nanganiko, skigiparang aro poraienggipa chatro chatrirangna chelchakgiparangko dona nanganiko UASEJF dol aganangaha.
Shillong songjinmani NEHU-o pangchakna nangjana gita NEHU Tura campus-ona dingtang dingtang department rangko ra·bae on·anichi A·chik chadamberang Shillong ona re·angna nanggija a·jatangon poraina man·ani cholko ra·bachina kam ka·anirangko namdapatna UASEJF dol janapangaha.
Uni gimin ia a·selrangko ta·raken am·sandianirangko dake kakket bichalko on·china UASEJF dol a·dok sorkario mol·molangaha.
