A·song gimikon training rangko ong·atengon FSSAI (Food Safety & Standards Authority of India) nigita FoSTaC (Food Safety Training and Certification) training ko salgittamna Tura Nazing bajar-o donggipa Food Craft Institute Building ni Prime Hub Conference Hall-o ong·atenga.
Ia training ko Commissionerate of Food Safety, Meghalaya, Shillong aro Assistant Commissioner of Food Safety, West Garo Hills Tura apsan bakrime ong·at angaha. Ia training ko ong·atani miksonganiara dingtang mancha cha·anirangko jako ra·e sualenggiparangna an·tangtangni ka·enggipa kamrango Food Safety Supervisor ong·china ine Food Safety ni Assistant Commissioner Tangme Ch Marak u·iatangaha. Ia training o cha·anioniko bostu tarie badingna aro FSSAI ni dongimin niamrango pangchake rongtal an·talaniko rakkichina ge·etangaha.
Ia training programme ko Garo Hills ni North Garo Hills a·jao a·bachengatchengaha jeon Bajengdoba, Adokgre aro Resubelpara rango ong·atan baksana South West Garo Hills a·jani Ampati aro Garobadha oba sal 4 na ong·atangaha. West Garo Hills a·jao April 30 tarikoni May 3 tarikona cha·ani tarigiparangna jemangan bakery, mithai dokan, caterer, fast food cha dokan aro restaurant donggiparangna ia training ko ong·atangaha. Ia training ko re·baenggipa May 3 tariko Dadenggre ni skulrango Mid-Day Meal Incharge (MDM) rangnaba ong·atanggen. Unbaksana East Garo Hills aro South Garo Hills o ia training ko May 5 oni May 10 tarikona ong·atna miksonganikoba parakataha.
Food Safety and Training Certification ni Technical Session ko Kerala ni FSSAI Trainer aro Thiwas International Private Ltd Training Partner Binu K N skie on·angaha jeon ua cha·ani tarigiparangko chemical rangko bringija rongtale cha·anirangko tarichina didianiko on·angaha.
Ia programme o sak 3 Food Safety Officerrang jekai West Garo Hills ni S S Marak, North Garo Hills ni Tengkam T Sangma aro South West Garo Hills ni Junean Norombi Ch Marak ba dongpae bakko ra·angaha.
