East Garo Hills, Mangsang-ni ning·o donggipa Nongkongli aro Moronga songrangko Khasi Hills Autonomous District Council (KHADC) ni a·a ine Khasi rangni niamgri a·kangani koborrangko man·soe A·chik State Peoples’ Front (ASPF) dol re·ange songni lasker-rangko aro manderangko grongangaha.
Mogru, Nongkangkil aro Moronga songrangara Garo Hills Autonomous District Council (GHADC) ni ning·on ga·aka aro iano songdongenggipa manderangara A·chikrangan bangbatgipa ong·a. KHADC-ni niamgri a·arangko a·kangdraaniko songni manderang jegale ra·chakna man·gijaniko aganangaha.
Ia songo songdongenggipa manderango kakketgipa lekka pancharang donge GHADC-ni ning·on an·tangtangni gamchatbegipa vote-rangko mamingba neng·nikani dongijaan on·baenga ine ASPF dolrang parakataha.
Uni gimin jat gegnini gisepo ma·sisrete nanggrikani ong·janagita Chief Minister Conrad Sangma-ko ta·raken ia obostako nirokatchina ASPF dol mol·molataha. Unikoa, GHADC-ni CEM-ko council-ni ning·o ga·akgipa a·arangko dingtang mancha digital mapping ka·china u·iataha. Indake dakanichi GHADC-ni a·ako sekdraaniko namen ma·sigen mong·songbate KHADC aro Assam-ni sim ari jolrango ine uamang parakataha.
