District Auditorium Tura-o, Garo Hills Autonomous District Council (GHADC) ni Council Day ba atchiani bilsi 73 gapani salko da∙alo maniangaha.
Tom∙bimonganiona Meghalaya a∙dokni Deputy Chief Minister Prestone Tynsong mongsonggipa sokgipa ong∙e bakko ra∙angaha. Una agreba GHADC-o kamko ka∙giparang, sorkari bilo donggengiparang aro opposition-o ong∙enggipa MDC-rangba ku∙cholsan ia salko gisk ra∙e manianio bakrimangaha. Tura ni adita dingtang dingtang skulrangni chatro chatrirang, Tura Music Academy aro Do∙kaku Art & Cultural Association uamangni git ring∙anirangchi, chrok mesae aro doka dam∙anichi maniako an∙soataha.
Chang 73 Council Day-ko manianio GHADC-ni Chief Executive Member, Albinush R. Marak Garo Hills Autonomous District Council-ni gimin adita talatanirangko dake on∙angan baksana GHADC-ni neng∙nikanirangko janape Deputy Chief Minister-na memorandum on∙angaha.
Meghalaya a∙dokni Deputy Chief Minister Prestone Tynsong tom∙anio aganengon council-ni 73-gipa atchiani salko manianio GHADC-ni dilgiparangna katchaani salamko on∙chengaha. Ua dingtang mancha District Council aro 6th Schedule-ni on∙gimin niamrang an∙chingna maikai gamchata, bilrangko on∙a aro iako dal∙nikgija bon∙atgenchimode bang∙a gimaani aro nisianiko ra∙bana man∙aniko aganangaha.
Unikoa, Meghalaya a∙dok Assam-ni ning∙o ong∙mitingo Assamese ku∙sikko compulsory ong∙atna bill pass ka∙o Captain Sangma-ni Council of Ministers-oni kamtangko resign ka∙e ong∙kataniko Tynsong janapangaha. Sangma-ni a∙dokna aro jattangna on∙kange kam ka∙aniko aro unbaksa council-ni skanggipa CEM-ko uni bimchipanina mittelna aro gisik ra∙na nanga ine ua aganangaha. Iamang on∙kange dangdike on∙jaode an∙chingni ku∙siktang gimaaniona soknaba gnangchim ine Tynsong aganange ia council-ko ripingchina mikrakataniko on∙angjolaha.
