National Physique Championship (NPC) Rajasthan-ko amgopani ja∙mano Meghalaya a∙dokni niksenggipa body builder Atlanta D. Shira, Agartala-o ong∙atgipa NPC Tripura-koba ge∙gni gold aro silver medal ge∙sako man∙e cheangaha. Ian Meghalaya a∙dokna rasong aro A∙chik jatna katchabeani ong∙a.
Tripura-o ong∙atgipa National Physique Championship-o Shira ia chang Classic Physic category-o Gold, Body Building-o Gold aro Men Physique category-o Silver medal-ko cheaha. Ia changko ra∙e ua national gadango ia bilsion changgni cheaha.
Shira, uni chu∙sokaniko social media-o katchabee parakatengon ua pilak una sponsor ka∙giparangko, dakchakgiparangko aro sakanti nama kattarangchi ku∙pattianiko on∙giparangko demittelataha. NPC dingtang mancha Federation of Bodybuilding and Fitness (IFBB) ni ning∙o ong∙atenggipa ong∙a.
