Tura, Industrial Training Institute (ITI) college-o Electrical Appliances & Electronic Aplliances ni bidingo sal 15 na ong·atenggipa Executive Training program mijal saloni a·bachengaha. Ia program-ko District Commerce and Industries Centre (DCIC), Tura-ni a·bachenggipa Raising and Accelerating MSME Performance (RAMP) Scheme-ni ning·o ong·atenga.
Program-o mongsonggipa sokgipa Electricity-ni Deputy Inspector Milton R. Marak, bakko ra·giparangna bijolini gamchataniko aganangaha. Ia chasongo sakantian bijoliko jakkala aro bijoli dongjaode neng·nikanirangko on·a. Bijoliko skie ra·engon circuit diagram aro oka teka dakanikosa changna nangaija indioba naljokanio dakna nangani aro simsaksoanirangko u·inaba nanga ine Marak aganangaha. Ua ia program-o bakko ra·giparangko sorkarini on·enggipa ia cholko ra·e skia man·e an·tangni sapaniko bariatchina aganangaha.
ITI ni Principal, Crening Sangma, ia short term course-ni miksonganiko talataha. Ian trainee-rangna adita dilanichi aro class-rang ra·anichi skie on·enba nanggipa changa sapanirangko ra·bana ong·atenggipa ong·a ine Sangma aganangaha. Training institute rang bijolini course rango short term-ko somoirang chu·ongjani gimin long term course-rangko dakronga. Indake ong·genchimoba name subject-ko skianichi aro name agan golpoanichi uamang an·tangtangni changa sapaniko bariatna man·gen ine aganangaha.
Electrical Application-na sak 25 aro Electronic Application-na sak 25 dake seokaha aro ia training-rang koros nanga gri manderangna on·enggipa ong·a ine Functional Manager, DCIC, Tura Biondi D Shira aganangaha. General Manager, DCIC Centre, Tura Don Felicient R Marak-ba program-o aganangaha.
