Watershed Yatra l ko Songsak C&RD Block ni ning·o donggipa Koksi Songma songo March 21 tariko Soil & Water Conservation aro PHE Minister Marcuise Marak, Additional Deputy Commissioner (ADC), Albert G Momin aro gipin dilgiparangni dongpaanio a·bachengate on·angaha.
Iako a·bachengate on·ani gamchataniko aganengon samtangtangko aro manderangni janggi tangani cholko nambatatna chi aro a·arangko ripingna nanganiko Marak aganangaha. Ia Yatra ara Pradhan Mantri Krishi Sinchayee Yojana – Watershed Development Component 2.0 (PMSKY WDC 2.0) nigita dingtang mancha chi ripingna, nosto ong·gipa a·arangko tangchapilatna aro dingtang dingtang karirango ge·a gamaniko bariatna miksonggipa ong·a ine aganan baksana mikkangchina nambata gadango janggi tangani cholrangko ra·bana songsul noksul rangko apsan bakrime kamrangko ka·na Marak didiangaha. Unbaksana ua jolo JJM ni kam ka·anirangko namdapatna aro pilak neng·nikanirangko nirokatna miksonganiko Marak aganangaha.
A·dokni pilak kona noksikona development ko ra·bana sorkarini bimchipe kam ka·aniko Songsak ni gitcham MLA aro Program Implementation ni Chairman Nihim D Shira aganangaha. Unbaksana Soil and Water Conservation, Williamnagar Division ni Divisional Officer Corbeth Homa D Sangma ni on·kange kam ka·e on·aninaba Shira de·mittelangaha.
