Meghalaya a∙dok, skia-porani bidingo Ministry of Education, Performance Grading Index (PGI) o pangchake bon∙kamgipa gadangko man∙anina Social Activist, Cherian Momin uni kusi ong∙gijaniko parakataha. Ian Conrad Sangma aro uni dilenggipa MDA sorkarini skia-poraianiko skanggipa mikkango done kam ka∙na ku∙rachakaoni dal∙bea chu∙sokgijani ong∙a ine ua matnangangaha. Sorkarini skia-poraiani gamchataniko nikchanganiara mikkangchi re∙mikkanganina champengsoani ong∙a ine Momin parakangaha.
A∙doko songdongenggipa ong∙e, skia-poraiani pilak neng∙nikanirangko name rongtale u∙ie ra∙na sakantion bil donga ine Momin ia neng∙nikanirangko am∙sandie kam ka∙china sorkario dabiangaha. Nambata ja∙kurangko de∙e tangka paisarangko chamate, rika cho∙aniko tang∙doatan baksa nambata gadango bidako pakwate on∙anian sorkarini dakna nanggni kam ong∙enga ine Momin parakangaha. Momin, skigiparangni gamchataniko sorkarina u∙iatan baksa uamangna namgipa skianiko on∙a, cholrangko ra∙bana aro dakchakaniko on∙a gita didianikoba on∙angaha. Iachi a∙dokni skia-poraianio chu∙gimik tang∙doanina dakchakani ong∙gen ine Momin parakangaha.
Unbaksana pilak ma∙aparang, songsalni manderang aro dilgiparangko skia-poraiani a∙baona dakchakaniko on∙pana Momin mikrakaniko on∙angaha. Momin, Chief Minister Conrad Sangma-ko uni dilenggipa MDA sorkarini ku∙rachakgimin gita bida pakwatanio dingtanganiko ra∙bae kam ka∙china didianikoba dakangaha.
