A·doko politics-ni gita opposition-ni dilgipa aro gitcham Chief Miinister Dr. Mukul Sangma re·baenggipa sal somoirango badia dol baksa bakrime kamrangko ka·anggen ine adita sing·anirangna, ua dikdiksa somoina mangmang chanchiaigija mikkangchina niksamsoa gnangsa ja·ku ko de·anggen ine Dr. Mukul Sangma parakataha.
Batanggimin somoio, Dr. Mukul-ni melibatsranggipa dilgiparangoni saksa Winnerson D Sangma-ni Bharatiya Janata Party (BJP) dol baksa bakrimeani ja·mano Dr. Mukul Sangma-ko BJP dol baksa bakrimna ka·dongsoaniko adita kattarangko knaangaha. Una agreba Sangma dingtang mancha gitalgipa party ko bikotna miksonganiko aro Congress dol baksa bakrimtaina chol ra·ani kattarangba giproroangaha.
Mukul Sangma, Congress doloni ong·katani ja·mano Trinamool Congress (TMC) dol baksa bakrime kamrangko da·o dipet ka·angenga. Batanggimin 2023 bilsini election-o chu·sokjae sak 5 MLA-rangchisan party nigita kamrangko ka·engani gisepon Sangma TMC dol-ko watangnaba donga ingipa kattarangni giproroanganikoba knana man·angaha.
Politics-o pangnan niksamsoesa kamrangko ka·na miksonganiko nangnike aro Meghalaya a·dokni manderangna maikai namgipa bewalo kamrangko ka·na man·aniko nigrikesa ja·kuko de·na nanga ine Dr. Mukul parakataha. Iako aganengon, bang·bata changon dilgiparang national party rang baksa bakrime kamrangko ka·on dolgnini gisepo chanchianirang dingtanggrikani gimin Meghalaya gita chonbegipa a·dokni nangchongmotgipa nangnikanirangna kamrangko ka·na namen neng·nikaniko man·ronga ine Sangma aganangaha.
