Shillong songjinmao re·anggipa March 15 tariko Garo me·asa cha·dambe saksako adita Khasi panterang jinma dokgrimaha. Ia obosta salni 2:30 aro 3 bajini gisepo ong·aha jekon doka man·gipani ma·gipa video ka·giminko man·e uni facebook profile-o upload ka·ataha. Ia chadambeko dokna chakku, knuckle aro gipin bosturangko ra·baaha. Ua computer porikkana tarisamsonagita re·angmitingchim ine ma·gipa u·iataha.
A·chik Conscious Holistically Integreted Krima (ACHIK) dolrang, ia kamko ong·nikjae raken jegalataha. Home department-ko uamang ta·raken raka ja·kuko de·china janapataha aro che·em che·em am·sandienba dosi dakgipa manderangko rim·e sastiko on·china dabiataha. Meghalaya-o tom·tomaniko aro naljokaniko home department on·a nanga, mongsongbate Garorangna jemangan Shillong songjinmao jatsani on·chepako man·e kena gnang dongna nangja ine ACHIK dol parakataha.
Pilsagita ia obostarangan Meghalaya-o jatsa jatgipin baksa itihaso nanggrik dakgrikaniko gisik ra·ataiani ong·a. Uni gimin kakket bichalko doka man·gipana aro uni nokdangna on·china ACHIK dabiangaha, unbaksana a·doko niam bidikko jakkale manderangna naljokaniko on·china daito gnanggiparangko uamang didiataha. Unikoa, maming ja·kuko ga·jaode jingjengataniko dakna draatako man·gen aro kakket bichalko niamgita am·gen ine ACHIK janapataha.
