March13 tarik, Bristibar salo One Day Skill Training cum workshop-ko Muga Silk Production aro Livelihood Development-nigita muga jo·ongrangko jilgiparangna salsana skie on·aniko Tura, Central Silk Board-ni Training Hall-o ong·atangaha. Ia program-ko Incubation centre aro Tura NEHU Campus-ni dakchake on·anichi State Sericulture Department baksa Central Silk Board Tura nangrime ong·atangaha.
Ia program-o West aro South West Garo Hills-ni Divisional Forest Officer Ganeshan P, sorkarini department-rangko gipin department-rang baksa a·jao songdongenggipa manderangni namgnina kamrangko ka·genchimode dal·bata gadango chu·sokaniko man·gen ine aganangaha. Unbaksana Incubation centre aro NEHU Tura Campus-ni Director aro Nodal Officer-rangni jotton ka·e kamrangko chu·sokatna man·anina mittelpilskaaniko dakange, State Sericulture department baksa nangrime kamko ka·anichi manderangna namgipa cholrangko on·a gita man·gen ine Divisional Forest Officer aganangaha.
Ia program-o bakko ra·giparangna skie ra·e u·ianikosan on·a miksongani ong·ja maina ian mingsa tangka paisa man·ani cholba ong·engani gimin buring bolgrimrangko maming dakeba nosto ong·atgija muga jo·ongrangko jilanirangko dakchinaba Ganeshan P aganangaha.Central Silk Board Tura-ni Scientist-C, Dr. Indra Kumar muga jo·ongrangko jile cha·ani gamchatani aro uarangko jile tangka paisarangko man·ani bidingo ia training-o bak ra·gipa sakantinan aganangaha.
Ia Incubation centre-nigita Williamnagar, Resubelpara, Jengjal, Mendipathar aro Okkapara jolo donggipa dingtang dingtang songrangona sericulture mission-nigita 2019 bilsirangon re·a doe nianiko dakangaha jeon muga jilanirangko maikai namdapatna man·ani cholrangko am·sandie kamrangko ka·angaha ine Incubation Centre, NEHU Tura Campus-ni Nodal Officer Dr. R Sasikumar u·iatangaha.
NEHU Tura Campus-ni Campus Director , Professor Sujata Gurudev, Vice Chancellor-ni dilanio aro dakchakanichi manderangna incubation centre dingtang mancha bading chiwale cha·giparang aro ge·e game cha·giparangna dakchakaniko on·angenga ine aganangaha. Muga jo·ongrangko jilani gamchatani bidingo Sericulture department, Garo Hills region-ni Zonal Officer Sanre G Momin-ba muga jile janggi tangani chol aro iani gamchatani bidingo aganangaha.
Ia program-ni bon·kamao jilani bosturangko man·a kragipa manderangna suale on·angaha.
