Police department-o ge 3,000 kamrangna rimnapaniko ia bilsini June jao matchotatgen ine Deputy Chief Minister in-charge Home (Police) Prestone Tynsong Bristibar salo assembly-o parakataha.
Police department-o kamna rimnapna bang·en nanganiko ma·sian baksana aro kam ka·anirangko maming neng·nikagri ka·na man·agita recruitment board ko dingtang mancha uamangni daito aro kam ka·na nanganiko ta·raken matchotatna ge·etangaha ine Tynsong aganangaha.
Iani a·selan a·doko Meghalaya Residents Safety and Security Act (MRSSA) ko ra·gatna ru·utataha ine aganengon, ia nakatatgipa kamrangna rimnapani ja·mano pilak police station rango chu·ongagita bil donggen jeon gipin a·dokoni re·bagipa manderangko ia Act-o pangchake register ba segataniko dakangna cholko on·anggenok ine Deputy Chief Minister aganangaha.
Ia Act ko da·onin a·bachengatangengaha jeon a·paloni re·bagipa manderangko police station aro police outpost rango sing·sandianiko dake uamangni bidingo u·ie ra·giminrangko district task committee na watatskagen ine Tynsong parakataha.
Department-o chu·ongagita mande dongjani a·sel kam ka·anirangko aditan ru·utataniko nike, ia pilak ka·na nanggni kamrangko somoigita matchotatna DGP an·tangan matchotsranggijagipa kamrangko niange ka·na daito ko ra·angaha ine u·iatangaha.
