Tura Government Medical College-ko rikanio 75 per cent kamrangko matchotaha ine Health Minister Ampareen Lyngdoh da·al salo Question Hour-ni somoio aganangaha. Ia project-na 99 acre mang a·arangko chatchirang on·gilaha. Da·o dipet ia college-na ma·mong sorkari gong 170.10 crore-ko chamataha, PMC-na gong 185.65 crore aro PMC contractor-rangna 178.6 tangkarangko pakawatataha ine Lyngdoh talatangaha.
Leader of Opposition (LO) Dr. Mukul Sangma, ia project-ni ning·o skichaknagita chong·motan teaching hospital-o baita ge palangrangko donaha, ua Lyngdoh-o sing·aha. Ia project-ko dongenggipa a·a chia aro gam-jino rika cho·aniko taridaptaie skichakgipa hospital-ranggita jakkalchina sorkarini dakenggipa ong·a ine Sangma aganangkuaha.
NMC-nigita 100 seat medical college-ko chalaina ge 420 palangrangko nanga aro uarangko donchakna rika cho·aniko dal·dapatnaba dingtang budget-rangko tarina nanganiko Health Minister aganchakaha. Da·o sorkari ia kamna chol dongkujaenga jeni a·selan project-ni kamrang ja·manchakenga. Indioba Maternity Child Hospital (MCH) aro Tura Civil Hospital-o palangrangko baridapataha ine Lyngdoh aganangaha.
College-ko matchotatna assembly-o Sangma-ni ka·donganiko on·a aganon, ua somoirang dingtangaha aro LMC-ba namen sason rakaha jeon niamogita chu·sokjaode maming dakeba ra·chakjawa ine Lyngdoh parakangaha. Indake ong·genchimoba kamrangko on·kange ka·enga aro 2026-2027 bilsirango bimang ong·atna jotton ka·gen, Lyngdoh agandapangaha.
