West Garo Hills, Tura-ni Architecture aro Urban Planning College-ni academic session-ko a·bachengatna a·dok sorkari All India Council for Technical Education (AICTE)-ni ra·chakaniko sengkuenga ine Education Minister Rakkam Sangma parakataha.
Ia college-ko rikanio dingtang dingtang neng·nikanirangko man·genchimoba nokrangkode rikman·aha aro da·o College-ko a·bachengatna AICTE-ni ra·chakanikosan seng·kuenga ine mijal salni Assemby Budget session-o sing·anirangko dakanina Rakkam Sangma aganchakangaha.
Ia kamna website-ko December jarangosan kuliani gimin sorkari AICTE-ni ra·chakaniko man·a dorgasto-ko galataigen ine Sangma aganangaha. Project-na ma·mong sorkarini gita 90:10 ratio aro a·dok sorkari baksa dake chu·gimik gong crore 26 tangka paisarangko ma·mong sorkari chamataha aro da·o dipet crore 23.4 tangka paisarangko watataha ine Rakkam Sangma aganangaha.
College-ko a·bachengate on·a man·kujaenganina opposition dolni dilgipa Mukul Sangma sorkariko a·dita sing·doanirangko dakangaha. Ian ma·mong sorkari aro a·dok sorkari dolgnini project ong·a indake ru·utatanichi ma·mong sorkarini mikkangchina chamatgipa project-rangko champenge don·agitaba ong·enga ine Sangma aganangaha. A·doko ia college ge·sakosan Tura-o rikna nangaija maina bang·a chadamberang ia course-ko poraina sengtokenga ineba Sangma agandapangaha.
Mukul Sangma-ni Education Minister Rakkam Sangm-ko ia project-ni ru·utatani a·selrangko donuna jotton ka·enga ine matnanganirangna ian Covid sabisini aro ramarang dongjani a·selsa kamrang ja·manchakaha aro kamrang da·o chu·gimik matchotmanaha aro taraken college-ni academic session-ko a·bachengate on·gnok ine Chief Minister Conrad Sangma talatangaha.
