Batanggimin 2022 bilsio a·dok sorkarini Rongjeng Civil Sub-Division ko songe on·ani ja·manoba da·ona kingkingba gitalgipa office ni rika cho·anirangko a·bachengatkujani bidingo Rongjeng jolni nangrimgimin NGO dolrang uamangni local MLA aro Forest Development Corporation Ltd. ni Chairman Jim M Sangma ko gronge Chief Minister Conrad Sangma na chitti ko see on·angaha.
Ia gitalgipa office ko rikna tangka paisarangko chamataha ine ku·rachakgenchimoba kam ka·anirang ka·sinani a·sel Rongjeng jolko tang·doatanirang namen ja·manchakenga aro manderangna bang·a neng·nikanirangko on·enga ine NGO dolrang janapataha.
Una agreba sanna bannani gadangko namdapatna Sub-Divisional Civil Hospital ni rika cho·anirangkoba ta·rakkale nirokatchina aganangaha. Unbaksana gitalgipa Rongjeng Model College-o pora skiani a·bako namdapatna man·agita kimkimgipa Principal ko rakkichinaba mol·molangaha.
