South West Garo Hills, Ampati Degree College mijal salo bilsi 25 gapaniko chong·motan Silver Jubilee-ko maniangaha. Ia manianio cultural program-ko ong·atangaha jeon jatni git aro chrok mesaanirangko dakmesokangaha. Program-ona SWGH a·jani Deputy Commissioner, Hema Nayak mongsonggipa ong·e sokbaaha.
Nayak, tom·anio aganengon college-ko ru·uta bilsirangoni chalaibae neng·nikanirangko chagronggenchimoba chu·sokgipa ong·anina re·dilgiparangni kamrangko demittangan baksa katchaapaniko parakangaha. Ua college-o career counseling nanganiko aganangaha aro bi·sarangko mikkangchi dilnagita cell-ko bikotchina didiangaha. Chatro chatrirangko social media-ni namgniko ra·e u·i ma·sianirangko bakroatchina aro uko ge·a gamani aro kilding dokanirango jakkalchina ku·pattiangaha. ‘Knowledge is Power’ kattako janapange uamangko poraia skianio aro an·tangna chu·sokaniko ra·bachinaba Nayak aganangkuaha.
Governing Body-ni Secretary, Clement G. Momin sokbagiparangna college-ko bikotnagita neng·nikanirangko chagrongani bidingo program-o u·iatangaha. Ia college dongkujamitingo jolni bi·sarang Tura aro Shillong-ona doe poraina nanga jeon dongna bamna aro tangka paisanigita neng·nikanirangko man·aniko ua parakangaha. Ampati Degree College nangchongmotgipa ong·a aro ia college-ko bikotna man·anian songni nokni krenganichisa man·aha ine ua aganangkuaha.
South West Garo Hills a·jao poraia skianiko chubata gadangona tang·doatna ru·utbea bilsirangonin chanchisamsoaha. 1980 aro 1995 bilsio college-ko bikotna jotton ka·beoba tangka paisa aro manderang chu·ongjani a·selo ia kamko bimang ong·atna ja·manchakaha. Bon·chote, 2000 bilsini February 15 tarikosa Ampati-ni Lasker Lt. Nolledhy S. Daring-ni dilanichi Ampati Degree College-ko bang·a neng·nikanirangko chagrongahaoba bikotna man·aha.
