Timjim K Momin ko Meghalaya Pradesh Youth Congress (MPYC) ni President-ni kamko jako ra·e kam ka·na songanganiko Indian Youth Congress (IYC) ni President Uday Bhanu Chib u·iataniko on·angaha.
Momin, uko seokanina dingtang mancha IYC aro manderangni uo ka·donganina mittelangaha. Ia chu·sokaniara an·tang saksan mangmangni kam ka·achi ong·ja indiba apsan miksonganiko done pilak kam ka·giparang ku·cholsan ong·e ka·donge bakrimesa ong·a ine Momin aganangaha.
MPYC ni President ong·e, Momin dingtang mancha chadamberangni neng·nikanirangko nirokatna jekai kamna dilani, pekatgipa bosturangoni naljokatna, tangka jakkalsretaniko warachakna aro nambata pora skianiko man·atna kam ka·angna ja·ku de·anggen ine aganangaha.
Meghalaya ni chadamberangna mikkangchi nambate janggi tangani cholrangko ra·banagita aro kakket ong·e songsul noksul ko dilangna Momin aganangaha.
