Bangladesh aro India a·songni sima ari gita Garo Hills ona niamgri manderangni napsrukbaani batrikrikani gisepo, February 5 tarik Budbar walo BSF aro West Garo Hills police dolrang Bangladesh ni sak 9 manderang aro uamangko napsrukbana dakchakgipa sakgittam maderangko Dalu-o rim·na man·aha. Ia manderangko police dolrangni re·roroe nirokmitingo rim·na man·aha.
Ua manderang gari bolgni jean Maruti Eeco van (ML 14 A 0593) aro Maruti 800 (ML 09 A 3830) o songrebaengachim ine Police dolrang u·iatan baksana uamangoniko kakketgijagipa India a·songni Aadhar card rangkoba man·aha. Unbaksana mobile phone aro India ni tangka rangkoba uamangoniko man·aha ine parakataha.
Rim·a man·gipa Bangladesh ni manderangara Md. Mostafa, Manir Hussain, Md. Manik Mia, Nasir Ahmed, Md. Shah Alom, Motaleb Sk, Sofiqul Islam Badshah, Bilal Hussain aro Joel Miah ong·a. India oni uamangko napsrukbana dakchakgipa manderangara Sengbat R Marak, Prebiush M Sangma aro Samarendro Koch ong·a jekon niamni a·palo sima arigita napsrukbadilanina uamangko court-o mokordoma ka·angaha.
