A·chik Conscious Holistically Integrated Krima (ACHIK) dolrang, Purakhasia Public Health Center (PHC) o sanna bannanio aro rika cho·anio chu·onggijarangni bidingo WGH-ni DMHO ko nirokatchina chitti sedoataha.
ACHIK dolrang Purakhasia PHC-o staff-rang chu·onggijaniko janapataha jeon hajal 28818 aro 82 songrangni manderangna Doctor saksachi OPD, Emergency aro Administration-ko chalaienga ine uamang u·iataha. PHC-o nanggipa samrangkoba man·jaenga, indake ong·engon sanna bannaniko ra·enggipa nokdangrang a·palni pharmacy-rangoniko dam rake brena nangaona sokenga. Ian, bang·a nokdangrangna korosnigita boja bariatani ong·enga ine ACHIK dolrang janapataha.
Iasan ong·aigija, PHE department-ni chi sokatjani a·selo namgipa ringani chiko man·jaenga. Unbaksana, hospital aro staff quarter-rang namen nosto ong·aha jeon boundary wall-rangkoba name tarigija donaniko nikna man·eng. Iani a·selo, PHC-ona napchakgipa ramachipakna begruna am·enga ine uamang aganangkuaha. Hospital aro staff quarter nokrango ceiling aro wall-ranggita chi selanikoba nikna man·enga. Ia nokrangko bilsi 10 mang ong·piloba taridapa dongkuja aro manderangni naljokanina taridape on·a nangchongmotenga ine ACHIK dolrang parakangaha.
