Meghalaya Director General of Police ni dilanichi Drug Disposal Committee 2025 January 23 tarik, Budbar salo am·sandianio man·gimin pekatgipa bosturangko so·e galangaha.
Ia pekatgipa bosturangko East Jaintia Hills ni Lumshnong o donggipa Star Cement karkhanao so·e galangaha jeon Chief Minister Conrad K Sangma, Deputy Chief Minister Prestone Tynsong aro Sniawbhalang Dhar aro gipin dilgiparangba dongpae bakko ra·angtokaha.
Pekatgipa bosturang jean 2.9977 kg heroin, 2561.989 kg ganja, 10.16 kg white crystal meth, 2.771 kg yaba tablet, 270 Phensedyl bottle aro gipin samrangko so·angaha. Ia bosturang ni damrang chu·gimik gong 53,86,33,580 ni gita ong·a ine parakataha.
Pekatgipa bosturangko so·anichi Meghalaya a·doko pilak pekatgipa samrang ko badinggiparangni kam ka·aniko champengsoagita ong·a jekon mikkangchi a·doko indakgipa nisiatgipa samrangko jakkalaniko naljokatana Meghalaya Police dolrang krimkro ong·e kamko ka·angkugen ine u·iatangaha.
