Tura-ni MP Saleng Sangma, Samanda-o donggipa Ekalavya Model Residential School-ko da·al salo re·ange nirokeaha. Unbaksa, MPCC-ni President Deborah Marak, EGH a·jani ADC aro Engineer-ba re·chapangaha.
Sangma, rikenggipa school-ni kamrangko nipilangaha, contractor-ni kamni bidingoba u·ie ra·an baksana chatro chatrirang baksaba agangolpogrikaha. Ua dingtang mancha kamrangko somoigita matchotna nangani gamchataniko aro namgipa school nokko rikna janapangaha. Sangma, SGH Siju Ekalavya Model Residential School-koba re·ange nirokeaha jeon ua ia school-ko matchotahaode bang·a chatro chatrirangna poraie skie ra·na cholko on·gen ine aganangaha.
School-rangko private company-rang chalaigenchimode ru·uta somoina baikamgipa ong·na man·gijaniko Sangma janapaha. Uamangna on·on mikkangchina school-ko chipna nangaona ba bang·a neng·nikanirangko man·a ama aro chatro chatrirangnaba sinjetaniko on·a ine Sangma aganangkuaha. School-rangko baikamgipa ong·e chalaina man·agita namgipa model-ko ja·rikchina aro block office-ni staff-rang baksa somoigita agangolpogrike nirok simsakchina Sangma ku·pattiangaha.
