West Garo Hills, Selsella-ni NGO dolrang jekai GSU, FKJGP, GSMC, ASWA, ADE, ANYO, ACHIK aro NGCO, Selsella C&RD Block-ko Civil Sub-Division-ona tang·doatchina songdongenggipa manderangni palo Chief Minister Conrad Sangma-na memorandum-ko on·angaha.
Selsella C&RD Block a·doko ge·sa gitchambatsranggipa block rangni gisepo ong·ani gimin mande jelanirang ta·rake bariroroanichi songdongenggipa manderangna Civil Sub-Division dongjani a·selo bang·a neng·nikanirangko chagrongna nang·ao ga·akenga ine NGO dolrang aganangaha.
Selsella jolo songdongenggipa manderang sorkarini kamni bidingoba Dadenggre Civil Sub-Division-ona re·angna nangengani gimin songreanio tangka paisani gita neng·nikanirangko man·an baksana gamchatgipa somoirangko gimaatna nangenga ineba NGO dolrang janapangaha.
Selsella Civil Sub-Division-ko songe on·genchimode songdongenggipa manderangna bang·a namgnirangko ra·baani ong·gen jedake songdongenggiparang tangka paisa bon·e nanggipa kamrangna Dadenggre-ona re·na nanganiko champengatgen. Civil Sub-Division donganichi Selsella-o gitalgipa rika cho·ani kamrangko ka·anioba nambatatna man·anggen aro songdongenggipa manderangna kamrangko ka·e cha·na nambata cholrangko on·angan baksana sanna bannaniko dakanioba namdapaniko ra·bagen ine NGO dolrang aganangaha.
Ia pilak neng·nikanirangko ta·rake nirokate Selsella C&RD Block-ko Civil Sub-Division ona tang·doate on·china gita Chief Minister Conrad Sangma-o NGO-ni Chairman H.N.Sangma aro General Secretary Changle T. Sangma mol·molangaha.
