Songsalni namgnina re·mikkange kamrangko ka·na mijal salni bako gitalgipa Scorpio United Organization-ko Chenik Resort-o tom·e chanchianiko dake bikotangaha. Ia dol-ko dingtangmancha scorpio garirangni nokgiparangna Ismail R Marak-ni re·dilanichi Tura-ko skotong don·e a·bachengataha.
Ia gitalgipa dol-ko bikotani miksonganiara adita kamrangko chu·sokatna jekai kangal cholgrirangna ka·sae on·gile dakchakna, bolrangko ge·e sam bolrangko rakkina mikrakataniko on·a, garirangko sorokrango simsake salna mikrakataniko on·a, a·dokni daka rikanirangko gipin biaprangoni re·baenggipa manderangna mesoke on·aniko namdapatna, tangka paisa nanggija indin sanna bannaniko on·a aro politics nigita nangatgija kamrangko ka·angna miksongani ong·a ine Ismail R Marak aganangaha.
Ia tom·anio adita nangchongmotgipa kamrangni bidingo chanchirimange scorpio garirangni nokgiparang jerangan ia kamrango bakko ra·pana sikgiparangkoba re·bae bakrimpanaba u·iatangaha.
Ia gitalgipa dol-o jako ra·e kamko ka·na gita President-na Tengkrang A Sangma, Vice-President-na Mahmood A Sangma, General Secretary Rocky R Marak, Joint Secretary Kunal Ch Momin, Finance Secretary Munna Aron G Momin, Publicity Secretary Sumit Dey aro sak 15 executive member-rangkoba seokangaha.
