Tura Municipal Boardni gita bilsi gimiko nokantiniko jabol galani tangka paisa rangko chimongna man∙ahanina Adinggre, Nehru Ading aro Mondoltilla-na uamangni rake kam ka∙anina mittelpilskaani gita certificate rangko on∙angaha.
Uamangni bimchipbee kam ka∙ahanina Adinggre, Nehru Ading aro Mondoltilla-o donggipa nokpraknan jabol galchakaniko ge∙gniprak on∙gen ine aganangaha. Tangsekgipa aro tangsimgipa jabol galchakani miksonganiara nokdango jabolrangko dingtanggrike galaniko dakna miksongani ong∙a. Ia dam gittam jolo songdonggiparang samtangtangko rongtale rakkianio gisik nangbee kamrangko ka∙e mesokangaha.
Ia chonbegipa boksisko on∙aniara uamangni kamna mittelpilskaani ong∙an baksa sakantina samtangtangni biap rangko rongtale rakkina didianiba ong∙a. Jabolrangko bak dake galanichi ong∙telaigiparangko ripinganisan ong∙aija indiba biaprangko rongtale rakkina dakchakaniba ong∙a.
“Hai an∙ching apsan uamangni ia namgipa kamko ja∙rike mikkangchi an∙chingni wilwilao donggipa biaprangko namdapatna sakgipinrangnaba didianiko on∙a. Nokantini manderang ia chonbegipa ja∙ku de∙anichi samtangtangni biaprangko rongtale rakkina, jedakode mikkangchi an∙chingni de su∙drangna dingtanganiko ra∙banagita dakchakgen” ine TMB-ni dilgiparang didianiko on∙angaha.
