Garo Hills-ni NGO dolgni A∙chik Youth Welfare Organisation (AYWO) aro Federation for A∙chik Freedom (FAF), Tura songjinmani Rongkhon Songgital aro Asibra-ona re∙gipa ramarangko name tarie on∙jani gimin West Garo Hills a∙jani DC-na see parakataha. Iani bidingo NGO dolrang RTI ka∙angan baksa ramako tariani Detail Project Report (DPR) koba on∙china dabianiko dakangaha. Iako wilwilao donggipa Development Committee-rangni uamangona re∙bae janapani ja∙mano ja∙kuko de∙angskaaha.
Ia ramako name tarie on∙china songni manderangba kam ka∙mitingon project-ko man∙gipa Bimal Agarwala-na mol∙mole aganarang dongachim ine AYWO President, Sengbath Marak janapataha.
Tarigimin ramako NGO dolrang re∙ange nion, uko DPR-o mesokagita ka∙gija, kragija bewalo kam ka∙esa matchotataha ine parakataha. Uamangni janapatani gitade pakma kadona nanggipa biaprangko watchange donangaha aro 1509 metre nigita nalarangko tarina nanggipakoba kan∙dikdapataniko nikna man∙aha.
NGO rang PWD engineer (North – Division) ko iani bidingo grongna jotton ka∙oba namgni dongjaha ine parakangaha.
Ia kragija kam ka∙aniko uamang ra∙chakna amjawa inenba contractor-ni kamko dontongatchina DC na sedoe u∙iatanio parakataha. Unbaksana uko nirokgipani kosakoba raka ja∙kuko de∙china didianiko dakangaha.
