Education Minister, Rakkam Sangma, NEHU-o ong·enggipa obostani bidingo Chief Minister Conrad Sangma-ni ma·mong sorkarini Education Minister-ko nirokatna janapate committee-ko bosai man·ahani gimin dabianio pangchake jingjengatenggipa chatro chatrirangko dontongchina mol·molangaha. Ua dingtang mancha chatro chatrirangni be·en bimangni saknaa man·aniko nigrike uamangni poraianirango sinjetaniko ra·baani ong·gen ine aganangaha.
Indake ong·genchimoba NEHUSU aro NEHU unit KSU dolrang chatro chatri skarang baksa tom·aniko ong·ate jingjengataniko nipilangenba dontonggija dakangkuna tik ka·angskaaha. Uamangni jingjengatani da·o sal 15 ga·tapaha aro sal 15 ong·piloba VC-ko ra·galna Ministry-ni maming ja·ku ga·aniko nikjaenga ine NEHUSU General Secretary T. S. Kharsati parakangaha. A·songni President aro Governor jean Chief Rector ong·genchimoba chatro chatrirang baksa maming golpogrikani dongkujani bidingoba uamang kusi ong·gijaniko parakangaha.
NEHU-ni obostani bidingo VC Prabha Shankar Shukla-ni namgija dakanirangko university-ni tarigimin report-ko ra·e Chief Minister Conrad Sangma-na on·a NEHU-ni Alumni ong·e Cabinet Minister Paul Lyngdoh-ba ku·chakangaha. Sakgni member-ko seoke bosaigimin committee-koba VC-ni kamni a·sel NEHU-ni tang·onroroaniko re·ange an·tangtangna mikrontangchi nie ra·echinaba Lyngdoh didiangaha.
