Manipur a·dokni BJP sorkarioni NPP dol ong·katani ja·mano da·onaba sosojengjeng ong·anirang namkujaengani a·sel aro manderangni kosto ong·aniko nike Chief Minister Biren Singh-chi dilenggipa sorkario ka·dongna man·jaha ine CM Conrad Sangma mijal salo aganangaha. NPP dolnigita uamang baksa bakrime kam ka·angna bang·a Manipur-ni MLA-rang Singh-ni dilanio chakpaaniko on·a neng·niktokaha ine Sangma aganangkuaha.
Ma·mong aro a·dok sorkari tom·tomaniko ra·bapilna bang·a cholrangchi jotton ka·beaha. Sangma, ma·mong sorkari aro BJP dilgiparang baksa manderangna ka·dongani cholko ra·bapilna bang·a changon golpogrikaniko parakangaha. Indake ong·genchimoba uarangko name ba chu·onge jakkaljaha ine Sangma aganangkuaha.
Indita ru·utani ja·mano Manipur sorkari baksa bakrimaoni ong·katna ja·manchakbeani gimin sing·on sosojengjeng ong·anirang nampilna ka·donge nisengsoe donganiko Sangma talatangaha. Biren Singh-ni sorkarioni ong·katani NPP-ni BJP sorkari baksa ma·mongo bakrimani maming dakeba nangchakejawa. Ian Manipur-o ong·enggipa obostani bidingo ja·ku ga·anisa ong·a aro ma·mong baksa baksa apsan kam ka·rimani a·doko ba national gadango neng·nikani dongjawa ine Sangma agandapangaha.
